Norberaren gelak nortasuna islatzen duela esaten dute, eta horrekin guztiz ados nago.Urteak pasa ahala gure gela mundu partikular batean bihurtzen joaten gara nahi gabe. Beharbada ez dugu dekoratzaile jakitun baten laguntzaz egiten, baina liburuak, almohadak edo aulkiak jartzeko modua guk geuk aukeratzen dugu, eta beste inork ez ditu guk bezala jarriko.
Nire gela definitzeko bi hitz erabiliko nituzke: argia eta musika. Bertara iristen naizen bakoitzean etxe guztiaz desberdintzen duen giro batean murgiltzen naiz, eta gustora egotea sentiarazten dit. Berde kolorea nik aukeratu nuen logela egin genuenean. Lehenago ikasteko tokia besterik ez zen, eta beraz, logela zerotik hasi behar izan genuen. Kolore hau beti gustatu zait, lasaitasuna transmititzen didalako eta argitasunarekin oso ondo doalako.
Esan bezala, nire gela deskribatzeko hitzetako bat argia da. Hegoalderantz orientatuta dago eta leihoak beharrean, balkoi batera ematen duten ateak daude. Ate hauen beira handietatik argi izugarri polita sartzen da egun osoan zehar. Udan eguerdian sartzen den argia gustatzen zait gehien bat. Lurrean eserita geratzen naiz askotan eguzkiaren berotasuna aprobetxatuz, eta denbora azkarrago pasatzen zait horrela. Ate batean "atrapasueños" bat daukat, amets gaiztoak sartzen uzten ez dituena. Bestalde, argi mota ezberdinak daude gelan zehar eta bakoitzak giro ezberdina sortzen du. Pladurrezko horman dagoen arku barnean argitxo bat dago eta inguruan berde koloreko argi bola batzuk. Hauek pizten ditudanean giro beroagoa eta lasaiagoa sortzen da, erlaxatzeko aproposa.
Aukeratu dudan bigarren hitza musika da. Nire gelan nagoenean musika entzuten da ia denbora guztian. Hormak apaintzeko musikaren inguruko argazkiak jartzen joan naiz denboran zehar. Batez ere The Beatles eta John Lennon-en argazkiak dauzkat, baina baita beste talde askorenak ere. Batzuentzako argazkiak besterik ez dira izango, baina nire kasuan atmosfera berezi bat sortzen dute. Gainera, nire gitarretako bat bere oinean jarrita dago, besteen fundek ate ondoko txoko guztia hartzen duten bitartean.
Azkenik, duela urte batzuk ate ondoan "smile" hitza jarri nuen kartoizko letra batzuekin eta azpian nik egindako koloretako mandala bat. Gelatik irteten naizen bakoitzean nahita edo nahi gabe hitz hori irakurtzen dut, eta beharbada jarri nuen momentuan lortu nahi nuen helburua lortu dut, irrifar egitea ezinbestekoa iruditzen zaidalako.
Etxeko gelarik txikiena nirea da, baina ez nuke beste ezerrengatik aldatuko.
